Skip to main content Skip to page footer
A Rwanda Government Website

Ibitaro bya Gatonde n'abafatanyabikorwa bagiranye Inama igamije gusangira ibyavuye mu Isuzuma ry’Ubuziranenge bw’Amakuru y’Ubuzima (DQA)

Iri suzuma ryibanze kuri gahunda zitandukanye zirimo ubuzima bw’umubyeyi n’umwana, ubuzima bw’abaturage, igituntu, malariya na virusi itera SIDA.

Mu ijambo ryo kwakira abitabiriye inama, Umuyobozi Mukuru w’Ibitaro bya Gatonde, Dr. DUKUNDANE Dieudonné, yashimangiye ko amakuru y’ubuzima afite ubuziranenge ari ingenzi mu igenamigambi, gufata ibyemezo, kugena imikoreshereze y’umutungo no gukurikirana umusaruro wa gahunda z’ubuzima.

Yagize ati:

“Amakuru y’ubuzima afite ubuziranenge ni ingenzi mu igenamigambi, gufata ibyemezo, kugena imikoreshereze y’umutungo no gukurikirana umusaruro wa gahunda z’ubuzima. Iyo atuzuye cyangwa adahuye n’ukuri, bigira ingaruka ku igenamigambi no ku bwiza bwa serivisi duha abatugana.”

<figcaption> </figcaption>

Yakomeje asaba ibigo nderabuzima gukoresha ibyavuye muri iri suzuma mu kunoza imikorere no gukosora ibitagenda neza anashimangira ko abayobozi b’ibigo nderabuzima bakwiye gukurikirana ko amakuru asuzumwa mbere yo koherezwa, amakosa agakosorwa ku gihe, kandi ubufasha bugasabwa aho bukenewe.

Yongeyeho ko Ibitaro bya Gatonde byiyemeje gukomeza ubufatanye n’ibigo nderabuzima, Ikigo cy’Igihugu gishinzwe Ubuzima (RBC) na Minisiteri y’Ubuzima (MoH) mu kunoza imicungire y’amakuru no guteza imbere serivisi z’ubuzima.

Ku ruhande rw’Ikigo cy’Igihugu gishinzwe Ubuzima (RBC), ubutumwa bwibanze ku kamaro k’amakuru yizewe mu gukurikirana imikorere ya gahunda z’ubuzima no gufata ibyemezo bishingiye ku bimenyetso.

Uhagarariye RBC yagize ati:

“Ubuziranenge bw’amakuru y’ubuzima ni inshingano ihuriweho n’inzego zose zigira uruhare mu mitangire ya serivisi z’ubuzima. Ibyavuye muri iri suzuma bikwiye kutubera umusingi wo kumenya ibitagenda neza, kubikosora no gukomeza kubaka ubushobozi bw’abakozi. Turashishikariza ibitaro n’ibigo nderabuzima gukomeza gukorana, kugira ngo amakuru atangwa abe yuzuye, nyayo kandi yizewe.”

Mu rwego rwo gushyira mu bikorwa ibyavuye muri iri suzuma, abayobozi b’ibigo nderabuzima bitabiriye inama biyemeje kurushaho gukurikirana imicungire y’amakuru mu bigo bayoboye. By'umwihariko, biyemeje:

  • Gukomeza kugenzura amakuru mbere yo kuyohereza kugira ngo hirindwe amakosa.
  • Gukosora amakuru atuzuye cyangwa atari yo ku gihe.
  • Gushimangira ubufatanye n’abakozi bashinzwe gukusanya no gutanga amakuru.
  • Gukoresha ibyavuye muri DQA mu gukemura ibibazo byagaragaye no kunoza imikorere.
  • Gusaba ubufasha bwa tekiniki ku nzego zibishinzwe igihe bahuye n’imbogamizi.

Mu biganiro byakurikiyeho, abitabiriye basangiye ibyavuye mu isuzuma, bagaragaza imbogamizi zikigaragara ndetse baganira ku ngamba zafatwa kugira ngo amakuru akusanywa kandi atangwa arusheho kuba ayizewe, yuzuye kandi atangwa ku gihe.

Iyi nama yabaye umwanya mwiza wo gusangira ubunararibonye no gushimangira ubufatanye hagati y’Ibitaro bya Gatonde, ibigo nderabuzima n’inzego z’igihugu mu guteza imbere ubuziranenge bw’amakuru y’ubuzima.

<figcaption> </figcaption>