"Iyo umwana agwingiye mu gihagararo n’imitekerereze irangirika.” ibyagarutsweho hatangizwa icyumweru cyahariwe kwita ku buzima bw'umubyeyi n'umwana

Kimwe n’ahandi mu gihugu kuri uyu wa 12 Kamena 2023 hatangizwa icyumweru cyahariwe ubuzima bw'umubyeyi n’umwana mu gace karebererwa n’ibitaro by’Akarere bya Gatonde. Iki cyumweru cyatangirijwe ku kigo nderabuzima cya Janja ku nsanganyamatsiko igira iti “Hehe n’igwingira”, abitabiriye uyu muhango bakaba bibukijwe ko bakwiye gufata iya mbere mu guharanira ubuzima bwiza bakingiza inkingo zose, bita ku mirire n'isuku by'umwana no kuboneza urubyaro.

Mu kiganiro yagejeje ku bari bitabiriye NSENGIYUMVA GAHIGIRO Claude ushinzwe serivisi z’ikingira mu bitaro by’akarere bya Gatonde yagaragaje ibikorwa  biteganyijwe muri iki cyumweru birimo gutanga vitamin A, gupima imikurire (MUAC n’ibiro) Gupima ibijyanye no kugwingira bapimwa uburebure; Kuboneza urubyaro ku bantu bakuru babyifuza; Gukingira abana bacikanwe n’inkingo zisanzwe; Gutanga ibinini bya Albendazole ku bana bafite k uva ku mezi 12 kugeza ku myaka 15; Kwigisha kwirinda imirire mibi ; Gukangurira abagore batwite kwipimisha hakiri kare (bakimara kumenya ko batwite) ; Gukingiza abana ; Gukangurira abaturage kugira umuco w’isuku n’izindi gahunda zirebana n’ubuzima bw’umubyeyi n’umwana.

^{NSENGIYUMVA GAHIGIRO Claude atanga ikiganiro}

Dr. DUKUNDANE Dieudonné uyobora ibitaro by’Akarere bya Gatonde yabwiye abitabiriye ko nibakingiza inkingo zose, bakita ku mirire n'isuku by'umwana no kuboneza urubyaro nta gwingira rizabaho.

Yagize Ati: “Nk’uko insanganyamatsiko ivuga ngo ‘Hehe n’igwingira’ twese nitwitabira gahunda zo gukingiza inkingo zose, tukita ku mirire n'isuku by'umwana no kuboneza urubyaro nta gwingira rizabaho.”

Yongeyeho ko “Nubwo byitwa ko ari icyumweru cyahariwe kwita ku buzima bw’umwana n’umubyeyi ariko izi serivisi zisanzwe zitangwa bityo turakangurirwa kuzishaka no kwita ku byatuma ubuzima bugenda neza”

Ati: “Ikindi ngira ngo mvugeho ni ibijyanye n’imirire mibi; aho usanga ibyo twagakoresheje tukagira imibereho myiza birimo amagi n’ibindi tubyijyanira ku isoko abana bakagwingira kandi atariko byakagenze; ibi rero biteza ibibbazo kuko umwana ugwingiye atangwingira mu gihagararo ahubwo n’imitekerereze irangirika.”

_{Umuyobozi Mukuru w'Ibitaro by'Akarere bya Gatonde aha ubutumwa abitabiriye}

MUKANTAGARA Melanie wari intumwa y’Ikigo cy’Igihugu gishinzwe Ubuzima (Rwanda Biomedical Centre) yasabye abaturage kugira uruhare mu mibereho myiza.

 Yagize ati: “Iyo umugabo adafatanya n’umugabo kuboneza urubyaro aba arimo kugira uruhare mu igwingira; abaturage badafite ubuzima bwiza baba umutwaro ku gihugu bityo rero turabasaba binyuze mu bikorwa birimo kubyara abo mushoboye kurera, gukingiza inkingo zose, kwita ku mirire n'isuku by'umwana no kuboneza urubyaro.”

^{MUKANTAGARA Melanie wari intumwa ya RBC muri uyu muhango}

Ubwo hatangizwaga iki cyumweru gifite insanganyamatsiko igira iti: “Hehe n’igwingira” abajyanama b’ubuzima, abayobozi b’inzego z’ibanze guhera ku rwego rw’isibo n’abandi bose bazagira uruhare mu bikorwa bigiteganijwemo basabwe kugira uruhare mu migendekere myiza yacyo hagamijwe kurushaho kuzamura imibereho myiza y’abaturage.

Umuyobozi w'ibitaro by'Akarere bya Gatonde atangiza iki cyumweru

Intumwa ya RBC ubwo yatangaga ikinini

Abaturage bitabiriye

Umunyamabanga nshingwabikorwa w'umurenge wa Janja

Abajyana b'ubuzima bagira urugare mu mibereho myiza y'abaturage

Abazakurikirana ishyirwa mu bikorwa ry'ibiteganijwe muri iki cyumweru 

Yanditswe na Emmanuel NZAYISENGA